歐冠盃八強啱胃口

歐冠盃八強對賽已揭曉，可以話啱晒胃口，而英超兩雄，阿仙奴與利物浦相遇係在所難免，總好過遇上防守多於進攻的車仔及“穩”字派曼聯，因為兵工廠與紅軍兩支球隊踢法都以進攻為主，而且地面組織性較強，大家都係快上快落，到時碰頭一定精彩。

羅馬最唔好彩，再次遇上剋星曼聯，心理上已經輸蝕，不過千祈唔好認為曼聯可以穩奪四強一席位，羅馬既然有實力淘汰皇馬，就有能力擊敗任何強敵。事實上，兩挫皇馬的比賽，都贏得相當精彩，而且踢出極高水準，所以曼聯絕對不可以因上季大炒羅馬而輕視對手，當然，羅馬最緊要是消除“恐魔症”，否則，有可能再一次遭到呢班“魔星”凌辱。

至於另一支英超球隊車仔，要入四強應該問題不大，因為對手係八強之中最弱一隊，呢支簡直上上籤，究竟費倫巴治陣中有乜“星”坐陣，可以打到八強咁厲害？有卡路士、基士文、阿歷斯及艾比亞呢幾位仁兄，但都難阻車仔再進一級。巴塞與車仔一樣，同樣所遇對手都並非太強，只係德甲的史浩克○四，過關機會相當高。

足球評述員　

Ben

電郵:ben_tdm2003＠hotmail.com