足球“女兒國”大封相

話說六國大封相是中國戲曲嘅著名戲匭，經常上演是因為大封相場面夠熱鬧，充滿喜氣洋洋的氛圍，不過“六國大封相”近嚟肯定要讓位予中國女足的新作——“女兒國大封相”。

呢齣“女兒國”大封相當然由中國足協自編自導，數年間一再更換中國女足的國內外主帥，結果似乎只是一蟹不如一蟹，但勝在新鮮兼熱鬧，仲帶挈內地媒體多咗幾日的體育版頭條。

邊個出資呢部戲呢？自然係選擇性財大氣粗的中國足協，在國內省級女足有球隊球員要靠賣礦泉水空樽養家、亞洲足球小姐月薪不過數千的同時，據聞中國足協近期請兩個外國教練組就各付出三十萬美元的費用，咁樣請來的兩位洋統帥“戲金”認真唔便宜！

主角自然是中國女足的洋教練、領隊同埋球員。至於戲橋亦新奇到唔恨：中國女足先有領隊罰遲到教練的款，繼而有洋教頭公開指責領隊教啲球員比賽出工唔出力，到最後女足國際賽慘敗後解散，外間傳聞炒教練震天，突然又有足協官員話未知結果……如此曲折離奇、一波三折的“劇情”簡直令莎士比亞都自愧不如。如果再註明此事發生在中國承辦奧運會的二○○八年，發生在數月後就參加奧運會女足比賽的國家隊身上，更足以讓編劇界好多人都無得撈。

中國足球真係新聞眼呀，呢邊上演足球“女兒國”大封相，嗰邊中國男足亦“不甘後人”，熱身賽竟然只與泰國隊三比三打和，須知道泰國足球從來就唔係中國隊的對手，咁都和得，死未！

一  鳴