禪山客滋油淡定

這個禮拜祇跑一次本地馬，但卻有打吡預賽。加上澳港盃即將上演，試閘便成為本周練兵戲肉。阿拉知道有馬迷剪存本欄，而且來信有讚有彈，所以特別肉緊。尋日朝四組試閘，阿拉一組不漏地如實報道。

第一組：一千米。祇得五駒列陣，賀蘭豆鬥劉志森格局。“澳洲情懷”一放到底，“皇冠禮物”前港澳盃盟主跑第二，依然寶刀未老。杜西奧一手執到實。“放下”評一一八分，有機會對抗香港馬，史丹利騎來有板有眼。未知“皇冠禮物”會否以馬語過兩招畀“放下”？好為澳門馬復仇爭光。

由第二組開始，祇試八百米，十駒列陣賓虛陣容。阿拉乘機認綵衣，最靚嗰件係“禪山客”，紅紅黃黃好搶眼。史丹利騎來滋油淡定，梁國浩爭冠軍又多一枚棋子。“玩具醒”彭浩然騎來依然咁醒，此馬英文馬名“聰明玩具”十分貼切。

錢健明上次在沙田爭香港打吡，座騎“絕塵”閘前起擒退出。有馬迷問阿拉，咁樣有無策騎費？答案係當過了磅出跑道，便袋袋平安。錢仔咁標青，大家唔使同佢擔心。今季爭冠軍追到杜西奧氣咳。但呢組座騎，“霸皇鷹”未有霸氣，反而杜西奧“花臣”唔上唔落，隱忍待發。

第三組魏廄“輕鬆略過”退出，原本預定由內田利雄執韁，今次無法啦！不過打吡馬“快樂森林”孝哥早已搵咗日將過檔，呢招叫做早有預謀。譚文就“單刀”狀態見靚，今次又落在史丹利手上。丹利哥今朝各駒隨時會集體出擊，千祈要吼緊，倘若走咗雞，就變成集體回憶了。

拉士一組，“金沙皇殿”跑拉士回來。此馬評分最低又好合理，但為何堂堂杜西奧唔肯放手？呢組阿拉喜歡“甜多多”及“人言是信”多些。前駒速度不俗，有前有後。後駒有火上力，又是英文馬名“你信不信”？