熱刺專阻車仔發達

聯賽盃車仔飲恨熱刺腳下，搞到一班“車手”見財化水，老闆“油王”出重奬金，竟然“豆零”都攞唔到，今晚聯賽再度碰頭，一班車手誓要拔除呢班“眼中刺”。不過，你話拔就拔，拉莫斯咪好冇面，要繼續爭聯賽錦標，問過“拉總”先啦，初盤車仔讓平手 / 半球，捧熱刺再拮爆車仔條“呔”。

車仔在足總盃爆大冷被英冠球隊淘汰出局，現在只剩歐冠盃及聯賽錦標，歐冠盃仲要過關斬將，而聯賽就唔可以再大意失分，今晚一戰其實對車仔相當重要，因為再有失誤的話，奪標之路就更加難行，所以壓力足以影響球員發揮，雖然近兩仗都可以輕取對手，都只係贏包尾的打比及新特蘭，基本上對車仔唔構成任何威脅，由拉莫斯接手後的熱刺，已經非同小可，要贏呢班波根本唔容易，除非車仔可以發揮出更佳水準。

聯賽盃熱刺部署得相當成功，活基治凍結杜奧巴非常奏效，整場比賽亦與車仔拉成均勢，所以今仗主場出擊，根本未驚過對手，而且球隊目前無慾無求，無任何壓力情況下，可以踢得更放，在自己地頭至少可保不敗。

推介：和波 2：2

足球評述員　

Ben

電郵:ben_tdm2003＠hotmail.com