科特布斯搶分有“法”

    德甲今期邊隊最“神”，未就係中國國腳邵佳一效力的科特布斯囉，上星期唔聲唔聲嚇你一驚，主場二比○擊敗實力高幾班的班霸拜仁，踢出咗今季代表作，亦都以較少的失球升上尾四，但係護級前景依然唔樂觀，所以今晚對住排第八爭足協盃入場券的法蘭克福真係唔輸得，乘着扳倒拜仁的餘威，作客受讓半球 / 一球可以一博。

    踢咗廿四場比賽之後，法蘭克福有卅六分排第八，只落後第五位的史浩克○四五分，爭取更高排名唔算好難，近十場波錄得五勝三和兩負，艾文拿天迪斯、芬連及度斯基的入球能力都好足，隱憂係傷兵實在太嚴重，主場出戰有贏波本錢，但冇十足把握，畢竟科特布斯要搶分護級必定去盡，鬥心足絕對有搶分的能耐，受讓不妨選科特布斯。

    推介：法蘭克福和1：1

    智叻星