足協盃八強預測

早兩日講完歐冠盃，今日又同大家講講足協盃，八強之戰最具吸引力，必選費倫天拿對燕豪芬，因為兩隊可以話係勢均力敵，有梅圖復出的費倫天拿已經成為奪標熱門之一，但呢支攻強守弱球隊，要過呢關都並非輕易，始終次回合要踢作客比較輸蝕，睇番對愛華頓一仗，全場處於被動狀態，證明呢班波踢作客又係畏首畏尾，如果主場對住燕豪芬搶唔到優勢，次回合作客又係等死。貴為荷甲班霸兼且歐冠盃常客，實力當然唔簡單，跌低一格踢足協盃，有足夠能力捧盃。

流浪對士砵亭又係不相伯仲，一隊快上快落以體力見稱，一隊穩打穩扎講求實際，邊隊晉級入四強，就要睇各自主場發揮，不過，士砵亭應可睇高些少，因為呢班波踢作客保守得來夠穩健，至於主場亦有一定威力，反而蘇超球隊出外比賽經常失準，士砵亭守到第一回合，基本上晉級在望。拜仁對加泰並非“依絲執”，最緊要自己能否踢出霸氣，因為西甲球隊夠硬淨，講技術、講戰術唔會輸蝕得好多。另一德甲球隊利華古遜應可順利過關。

足球評述員　

Ben

電郵:ben_tdm2003＠hotmail.com