魔法大師要吼緊

是朝彈閘，炒埋僅僅一碟。可幸有幾件第一班馬出來充撑場面，否則更加冇癮。

頭班馬就是頭班馬，“旭日之光”及“愉快出擊”目空一切睇晒全組。閘門打開，前駒在杜西奧胯下再顯光芒，從中檔一彈而出，隨即住來走，仍是第一匹衝過終點。這匹良駒，見佢一次比一次好，阿拉夠膽拍心口講，不出三回合，必有瞄頭。

“愉快出擊”雖由助手出彈，但走勢奇佳。全程內欄吊到實，眼見渾身是勁，出腳爽極。彈來僅以頭位飲恨第二，論態並不弱於前者，又係隨時起得快！

很久沒有上名的灰馬仔“包得嘅”，呢課彈閘，試來似有轉機。起步第四返來第三，表面睇冇乜驚喜，但其實已經不俗。終點前僅以一身位落後畀兩匹頂班高手，周日上陣，只是檔位較差，否則有機會突襲。

至於馬素利倉口“X○二二”，由彭仔出試。前段夠晒銳利，不過“拉士”則非常麻麻。現階段尚未係時候，多看幾回再作道理。

凱仔近況一般，手風呢家嘢有高低潮嘅，所以毋須替佢擔心。既有一身好本領，哪會冇馬贏？是朝“魔法大師”由佢駕馭，由頭到尾都咁好味。起步第七，回來又係第七，感覺上梗係曳極。但不要忘記，此駒雖然包尾，但僅落敗幾個身位，馬兒必然仍有勇態。今課只是輕舒步頭熱吓身，周日賽事榜上有名，應要考慮。

第二組，入閘較麻煩的是排一擋“W一三一”，舞咗幾分鐘才肯就範。雖入閘唔多順，不過貼欄躍出後，走勢卻兩回事，就此直奔終點，勁！

“潮洲大兄”又係一匹有進步的馬，全程擺在中擋走，表現出能跟能鬥，且此馬加速力特強呢！馬素利有心機去撚，唔怕冇馬贏，各位不妨拭目以待。

上仗已見進步的“諾言”，今回由貝立安試。頭段鞍上人稍揚韁繩，馬匹即有反應。黎榮聚雖手上馬匹不多，但勝在好心機。慢工出細貨，好快就掂，信不信由你。

最後值得一提，是寶志兄旗下的“聯一先鋒”。此馬倒後入閘頗為順利，由東洋雄駕馭，前段不算快，後勁不過不失。周日得這位師傅幫手，兼有個靚擋，希望跑得接近些啦！