女足鬧劇老記爆大鑊

中國足球“女兒國大封相”仍然繼續，最新一齣折子戲由內地著名足球記者、球評家李承鵬擔綱主演。呢位近期因為對中國足協舊年表現打唔合格分而被封殺的圈中猛人，利用多年採訪中國足球的人脈，一於對中國女足教頭鬧劇展開調查，繼而在博客上爆大鑊。

李承鵬稱，其實中國女足此次外籍教練與中國領隊之爭，並唔係乜嘢“中外之爭”，持呢種觀點完全係中國足球的外行並等同於幫助原諒中國足協的過錯。女足之爭其實是中國足協幾位主席互相挑剔對方推薦人選的結果，所以女足至會出現三年換咗六位中外教頭的“世界紀錄”。中國女足曾經達到世界一流，所以每位中國足協副主席都想染指女足以向上層爭功，反而係屢戰屢敗的中國男足因為成績太差，令到各位足協副主席都避之則吉。結果每一位女足教練都會有一位副主席支持同時會被有其他的副主席反對，每位女足教練的產生都是中國足協高層權力鬥爭的產物並最終會成為犧牲品。兩年來唯一例外的女足洋教頭多曼斯基之所以任教成績比較好，是因為佢罕見地唔屬於某位副主席選擇的人選。

事實上除咗現任的教頭伊麗莎白同領隊張健強外，還有好多任女足教頭與領隊都唔多妥，原因同樣係領隊同教頭往往屬於唔同的足協副主席嘅派系。此外，據稱中國足協內部存在一個“北體幫”，即係由畢業於北京體育大學的人包括謝亞龍與楊一民等，呢個小幫派在足協內部勢力好鬼大。

李承鵬又爆料話國字號球隊主教練上任後要送禮、送錢畀決策者的“黑金”傳聞圈內唔少人都知，只係無從證實。一位國字號球隊教練就自認因為唔送禮，畀足協官員話佢唔懂事。

難怪李承鵬話中國足球唔單止係國粹，更是國啐——國人啐而後快。

一 鳴