否認與梁洛施簽約十五年

    霍汶希拒回應“反骨聲明”

    霍汶希、樂易玲、王晶、黃柏高、羅嘉良、關心妍、孫耀威昨日於會展出席“藝人、經理人相對論研討會”，吳雨任司儀發問。他就近期最敏感、經理人最不喜聽的“反骨”作論題，問到王晶有何意見，王晶說：“預咗佢反骨，如果無料到無資格去反骨，反骨要能力，睇佢自己點承諾，都希望佢（藝人）有反骨能力。（唔激氣咩？）無得激氣，第一，我唔贊成簽咁長約，好似你哋英皇咁長約我反對，十五年太長，八年至十年正常。”

    此時Mani（霍汶希）開咪說：“簽咁短，捧紅後好容易走。”王晶反駁：“第七年如果你仲擺資源落去，而唔續約係你傻啦。有長期飯票在手，點反都無符，好似當年拍《網中人》，有個女角突然覺得唔適合就唔拍，換角後，結果個劇集係破收視。”

    吳雨再問到Mani對反骨看法，她表示：“可能我的藝人比較年輕，想法唔全面，我第一日做經理人已花好多時間心血，無諗過回報，當然希望見到藝人成名，對我係好鼓勵，至於反唔反骨，每個人角度唔同。”樂易玲說：“我成日同藝人講，我畀心機帶你，希望你有一日自己可以有議價能力，要畀佢出去闖闖，勉強無幸福，無嘢係一生一世。”

    論壇完結後，吳雨對梁洛施的反骨新聞不作回應，他說：“無針對任何一個藝人，公司出心，希望跟藝人永遠相處。”Mani亦不回應，她說：“我唔係迴避，依家講對Isabella或我公司都唔公平，只會造成傷害。”問到可有看過對方出的聲明？她說：“有，但唔會回應，希望事件快解決到，本身希望繼續跟Isabella合作，對佢期望好大，係我其中一個驕傲。”對於王晶批評十五年合約太長，Mani說：“其實唔係十五年，合約係商業秘密，總之唔係佢口中所講。”