焗豬柳

    儘管Bale多次強調，葡菜對豬的做法係完全冇嘥料，不過，都未夠粵菜去到咁盡，起碼葡菜中就沒有港澳人熟悉的“豬紅”！即如今次用的豬柳，亦是不及粵菜的做法多樣。

    街市常見的新鮮豬柳，港澳人稱枚肉，“枚”字涵概了其形狀與肉質；新鮮豬柳肉質冧滑，炒、蒸、煎用的都是急火，怕破壞了其鮮美。不過，葡國人養的豬又肥又大，一條豬柳等於中國豬柳的兩三倍份量，與凍肉檔所售的巴西豬柳份量無異，如果一味蒸炒煎，恐怕食到倒晒胃口都食唔完。忘了，鬼佬係唔識炒嘅！

    葡菜中，豬柳不離焗、煏、燴(切片)及切粒做石頭湯這四種做法。焗豬柳食味甘濃，加上近日新鮮豬肉貴到飛起，急凍豬柳更宜用焗法。但要小家庭三兩個人消滅一條大豬柳，似乎亦不是易事，所以，有時想試嘗新鮮口味，的確是要幫襯一下餐廳的。

    放假時有心情的話，做好一條焗豬柳，半條切片配上雜菜沙律，就是一道好正的正菜。剩下的半條切好放雪櫃，第二日可以夾豬仔包，可以煮拉麵時放兩塊，如此這般，又慳番一日下廚工夫。

    材料

    急凍豬柳1條(約三斤)、蒜肉12粒、鹹蝦葉3片、雞粉2匙、鹽1匙、橄欖油約300ml。

    做法

    一，雞粉、鹽撒匀肉面，用餐叉在豬柳上叉多個洞，讓味料滲入肉裡。

    二，用餐刀在豬柳上揷洞，塞入蒜粒，鹹蝦葉撕碎撒肉面，醃過夜備用。

    三，醃好的豬柳淋上欖油，用錫紙包好，入焗爐焗個半鐘，約二十分鐘翻轉一次。最後一次可掀開錫紙，燒十分鐘至金黃色。

    撰文李文娟

    製作左安麗