平凡中見不平凡

呢輪柏高“潛水”，無同大家見面成兩個幾月，其間，歐洲五大聯賽過半“換了人間”。國米、皇馬原本領先一大截嘅優勢幾乎殆盡，羅馬、巴塞尚有機會反超；英超最過癮，前兩個月阿仙奴一班“生牯仔”仲憧憬衝擊冠軍，到今日連次席自動出線歐聯資格亦不保。

呢度想講講車路士。觀乎英超，曼聯梗係當時得令，但細心分析，曼聯之騰飛，始終離唔開着晒火嘅C朗拿度，有幾場波無出C朗或C朗交唔出功課，曼聯即時變得平庸。論今季英超最平均、最穩定嘅強隊，始終都係超成熟嘅車路士，車仔成隊極有台型，粒粒皆星，但又唔覺互相爭功。須要知道，車仔今季受好大壓力，首先係球隊象徵人物摩連奴離開車仔，泰利、林伯特、布歷克等核心球員長期養傷，隊中多位非洲球星又要喺季中回國效力踢非洲國家盃，基本上，車仔雖然擁有英超最強陣容，但論狀態未足有奪冠嘅條件。

最令人懷疑嘅係領隊格蘭特，格君臨危受命接掌摩連奴遺下嘅帥印，大半季以嚟，都係活於摩連奴陰影之下。足總盃被班士尼淘汰、聯賽盃決賽不敵熱刺，都令格蘭特飽受壓力。老實講，格蘭特帶波唔算有特色，攻與守都未見厲害，但佢好了解陣中各球星嘅風格，令各人表現恰如其份，摩連奴搞唔掂林伯特與布歷克同場問題、舒夫真高是正選抑或後備嘅問題，佢都一一擺平，平凡中見不平凡，相信就係格蘭特嘅特色。

柏  高