碧咸歸隊唯創紀錄矣

靠卡比路開恩，碧咸終於在離隊五個月後重新成為英格蘭國家隊的一員。不過此一時彼一時，今時今日重返國家隊對碧咸嚟講，講到底都只有一個意義：第一百場代表英格蘭出賽。

確實球壇如美人，不許人間見白頭。縱使碧咸在大洋彼岸唔係主流嘅美利堅足球賽中有幾好狀態，都只不過係在發揮“餘熱”而已，昔日嗰招仿如小李飛刀式的自由球殺着，即使偶爾仲有多少餘威，終究已經唔係舊時嘅萬人迷。玩下中文的文字遊戲，發現個“碧”字真係有個白字係頭上，所以當碧咸行到個“白頭”運時，即係在球圈威風已經時日無多。

所以依家更多人關心嘅係英格蘭隊會選邊個做隊長，老牌過氣隊長碧咸重新戴返隊長袖標嘅機會即使仲有，都係屬於安慰奬之類。更有機會成為隊長都係現時的核心球員——唔包括碧咸在內。

當然，對於碧咸而言，能夠再次披上國家隊戰袍都幾過癮，事關一百場代表國家隊出賽確係好大嘅榮譽，鮮有古人難有來者，踢波踢到咁嘅份上，都算與有榮焉，夫復何求呢？不過諸位碧咸嘅粉絲真係要做定準備，事關今後每一場代表英格蘭出戰的賽事，分分鐘都有可能是碧咸國家隊之戰的最後一場，賣少見少，記得唔好錯過啦。

一  鳴