英超大戰果然夠照

    英超“Big4”大戰經已爆發，聯賽四大天王果然非同凡響，合演兩場精彩刺激、扣人心弦的比賽，當然有人歡喜有人愁，“紅藍陣營”成為大贏家，四二六紅藍大戰好可能會成為冠軍爭霸戰，而“軍”佬“兵”團輸波之後，分別跌落三四位，“粉絲”自然大失所望。

    本人覺得當晚車仔爆“廠”一場激戰認真夠晒峰迴路轉，五十八分鐘先失一球的車仔，以為聯賽錦標到此為止，但估唔到車仔可以“逆轉勝”，所以足球比賽未到最後一刻，都未知鹿死誰手。至於曼聯對利物浦，始於都係“魔”高一丈，無論整體踢法、球員大戰經驗，曼聯始終都係食住利物浦，一句講晒，技術性擊倒。

    講開雙紅大戰，原來當晚彩票公司在某大酒店搞咗個“赤的聚會”，即係紅魔紅軍迷一起欣賞呢場雙紅會，原來當晚紅軍迷竟然多過曼聯迷，因為着住紅軍波衫到場打氣球迷多過曼聯，真估唔到本澳魔迷會輸蝕。不過，人係善變，當紅魔入波之後，在場百多名“赤”色分子隨即歡呼雀躍，連一班紅軍迷都隨即變節，唉，原來足球真係現實。

    足球評述員　

    Ben

    電郵:ben_tdm2003＠hotmail.com