摩帥入主皇馬機會高

皇馬主場不敵華倫西亞，卡比路要被罷職的消息再次甚囂塵上，傳最大機會接掌這家西班牙豪門帥印的是摩連奴。常言空穴來風未必無因，即使上次盛傳摩帥過檔最終也是吹水，但那時可能是時機問題。至於今次再傳此風，摩帥入主皇馬亦增添了兩利好因素。

皇馬老闆近來本已對卡比路失去信心，到周日主場不敵華倫西亞，更加堅定其易帥的決心。人選當然會諗到離開史坦福橋後一直賦閒的摩連奴。自摩帥落車後，已傳出與幾家豪門有來往，當中包括巴塞同皇馬。其實，去年三月，皇馬已想將正在執教藍戰士的摩帥撬過來。但當時藍戰士有機會奪取三冠王，摩帥肯放過呢個擦亮招牌的機會嗎？所以拒絕了皇馬。現在當然唔同。更重要一點係，目前皇馬正準備羅致兩名球星，一位係曼聯的C朗拿度，另一位係波爾圖的基利斯馬。要引進C朗，除了要同曼聯傾掂數外，仲要C朗本人願意；基利斯馬則有多家豪門爭奪。然而，兩名球星都係葡萄牙人，與摩帥不單係鄉里，仲用埋同一個經理人。若搵到摩連奴執掌帥印，引入呢兩位球星的機會將大增。另一蛛絲馬跡，皇馬係阿迪打運動品牌的代言球隊，該品牌最近推出一款產品，代言人就係摩連奴。可以看到，連贊助商都想摩帥入主皇馬。

董 暉