京華春夢甜入心

康妮移民京城經年，已成地膽，知西門上京小住，忽然來電：“有好介紹！”佢好友自匈牙利回歸，帶回匈國名酒托卡伊，得悉西門死黨郁人善品酒，來電邀約，“叫埋郁人，東城國貿優笠咖啡見！”

今之京城，飮堂食肆隨處皆是，各式食制，要乜有乜。此優笠咖啡，位處小區，旺中帶靜，裝飾優雅，唔睇外面，直頭以為身處他鄕。此係京人投資，請了個奧地利大廚，以致鬼佬滿堂，係番邦世界。

頭盤小試，吓，果然有料到！細看透視廚房，大廚耍呢弄重，刀光鏟影；觀乎出品，有大家風範，搜匀馬交亦搵唔到如此正宗奧菜。吳京辦亦驚為天人：“如此正斗，點解唔知？”

康妮老友早歲移民匈國，忽遇明燈，得知匈國專出甜酒，舉世知名，乃匈國國寳。近年回歸京華，索性做埋代理，敎化國民。聽郁人講故，邊嘗托卡伊，天花亂墜，甜入心扉，呢晩京華春夢，冇走雞矣！

西門公子