韋利貴價浪人老來嬌

意甲綜合實力下降已成現實，但“瘦死駱駝比馬大”，一衆沙場老將紛紛喺意甲重拾第N個“春天”。恩沙基今季鋒頭稍歛，但另一意國前鋒韋利老樹逢春，仲有大把球隊爭住要；至於迪比亞路以卅三歲“高”齡，依然係祖雲達斯嘅“金童”，就更不在話下。

韋利真係意甲球壇傳奇，曾幾何時，佢係世界最高身價球員，其累積嘅轉會費紀錄至今仲係數一數二。韋利傳奇之處，不單在於佢係一部不折不扣嘅入球機械，更在於佢從來無喺一家球會效力超過三年，至今已效力過十五家職業球會，堪稱球壇貴價“浪人”。自從○六賽季離開AC米蘭後，佢喺摩納哥、森多利亞、阿特蘭大似係“寄宿”居多，加上接連受傷，狀態已不大如前。今季佢轉投費倫天拿，原本以為係充實後備力量而已，點知到季中呢部坦克車回勇，雖然入波唔多，但其衝鋒陷陣功架，喺意甲依然係頂班。

眼見韋利好使好用，識英雄重英雄，另一老將托迪亦向球會美言，希望來屆邀得韋利效力。假如成事，韋利可望成為第一位意籍球員效力過意甲所有頂級球會：祖雲達斯、拉素、國米、A米、費倫天拿、羅馬，昔日所謂“意甲七雄”，就只差徹底沒落嘅帕爾馬。

柏  高