得撫養權晒命

    奇雲自認係廿四孝老竇

    布蘭妮前夫奇雲甚少對傳媒開腔，近日接受雜誌訪問時，自誇奪得兩名兒子的撫養權後，成為盡責的全職湊仔公。

    三十歲的奇雲對《In Touch Weekly》雜誌表示：“我每日大部分的時間都喺屋企同兩個細路追追逐逐，我的日程表就係圍住佢兩個轉，我要灌輸畀兩個豆釘知道，無論發生咩事，都有愛他們的爸爸媽媽喺身邊，這點真係好重要。”

    其實奇雲與前女友莎爾杰克遜(Shar Jackson)亦育有一子一女，他受訪時煽情地表示：“我仍然深愛子女的兩位媽媽，希望佢哋兩位都知道，他們有需要時，我仍然喺度。我相信我對仔女付出愈多，我的生命亦會愈來愈精彩，未來的日子，我同仔女及家庭的關係，就係我最在乎的事。”