利華古遜燕豪芬齊看好

歐洲足協盃今晚爆發四場八強次回合大戰，首回合就勁吹和風，四場和咗三場，最估佢唔到的當然係俄羅斯的聖彼德斯堡，竟然作客四比一重創德甲勁旅之一利華古遜。因此形勢最好的亦係該支俄國球隊，有四個作客入球在手，除非主場輸夠四球，否則都幾難出局，所以係大半隻腳入咗四強。今晚主場出擊，我反而睇好利華古遜會帶來驚喜，但相信都難逃贏波出局命運。

至於燕豪芬對費倫天拿的比賽，又係勢均力敵一戰。費倫天拿首回合和一比一，唔可以主場擊敗燕豪芬，整定係放虎歸山，因為荷甲球隊響自己地頭踢比賽真係唔講得笑。查返紀錄，從歐冠盃轉戰歐洲足協盃的燕豪芬目前在荷甲居首，十五場主場錄得十一勝三和一負，其間入卅八球失十一球，陣中高華文斯、拉索域和化芬都係有料之人，防線亦算穩固，有一個作客入球在手，燕豪芬更加唔會同你搶。相對近況低沉的費倫天拿壓力更重，聯賽要保第四唔留得力，歐洲足協盃又處於被動局面，更慘情是人腳有限，射手梅圖復出後仍交到貨，但隊友就好唔掂，今次作客真係唔睇好。

  利華古遜勝二比〇

         燕豪芬勝二比一

智叻星