愛華頓主場阻“車”

車路士上仗完場前大意失荆州被韋根逼和，爭標希望大受打擊，令到今晚作客愛華頓增加唔少壓力，要全取三分的確有一定阻滯，初盤仲要讓對手半球，認真諗唔過。愛華頓上周打和伯明翰，踢法都係不外如事，根本唔似前列球隊，只係以爛打見稱，不過，球隊主場發揮唔錯，亦有不俗戰績支持，今仗面對強敵車路士未必輸晒，至少可保不敗，受讓有着數必捧愛華頓。

愛華頓要爭前四位置基本上非常渺茫，但一日仲有機會相信點都唔會放棄，何況亦要保住第五位置，力保下季踢歐洲賽資格，所以今仗絕對唔會放軟手腳，講平均人腳雖然未必及得車路士，但球隊打法勝在死纏爛打，而且有一定入球能力，防守亦相當穩健，三十四場只失廿八球，車仔要攻破愛華頓防線未必咁易，首循環作客都能夠打和車仔，今仗主場又“使乜驚”。

車仔保守打法確係不敢恭維，比起曼聯、利物浦及阿仙奴的進攻足球的確悶得多，所以贏波都係一球起兩球止，打完今仗之後，車仔就要連場硬仗，分別於歐冠盃對利物浦及聯賽大戰曼聯，所以對今晚一戰絕對不利。

推介:和波 1:1

足球評述員　

Ben

電郵:ben_tdm2003＠hotmail.com