盛世咖啡廳 氹區街坊好飯堂

    港澳很多人一日三餐，最喜歡去茶餐廳醫肚。人人掛在嘴邊的茶記，食物要夠地道、夠大件抵食，更要總有一間在左近！

    前身係格蘭酒店的盛世酒店，位處氹仔舊城區入口的大迴旋處，大堂十分闊落，酒店的咖啡廳就在三樓。自從經營方式轉變後，漸漸建立口碑，除咗搞掂酒店住客早晚餐，更成為附近街坊的口碑飯堂。

    搭電梯上到三樓，望左邊就係咖啡廳的半開放式水吧及廚房，第一印象乾淨企理，食得安心！餐牌上出品並唔算多，但茶記該有的粥粉麵飯、絲襪奶茶、炆雞翅、小菜諸如此類都唔缺少。同行的朋友就講我知，餐廳每季都會換上新餐單，唔使擔心會食到悶；佢兩公婆三朝兩日就過來打躉，加上係酒店餐街坊價，乾脆懶得在家開爐了。

    當日我哋點咗燒羊架、焗生蠔、燒汁銀鱈魚、鮑汁豆腐，我真係想唔到在咖啡廳都可以食到咁有酒店西餐廳水準的出品。焗生蠔、燒羊架固然係西餐師傅拿手好戲，銀鱈魚配燒汁、櫻花薑清口，顯見師傅係花了心思。鮑汁豆腐好嫩滑，清淡中不失鮮美。

    不過，最令人驚喜的，係一道該店師傅改良版的酸菜魚。師傅用泰國酸泡菜代替內地版的酸泡菜絲，更清爽更脆口之餘，更能帶出魚的鮮味。另外，師傅又將坊間慣用的大湯盆改為闊口深碗，令份量不太嚇人，亦增添精致感，抵讚！

    穎  兒