才貎雙全慧雲李

    一百零八年前今日，有大美女降生，荷李活驚艷寰宇，有佢一份。其所演者，皆傳世之作。未觀其片，當亦聞其名。此慧雲李也。

    慧女以廿六之齡演《亂世佳人》，即成奧斯卡影后，評審團讚“有佢咁靚，何需演技？有咁演技，使乜咁靚！”如斯評語，實在絕核。然天生麗質，恨死隔籬，想當年，撼低嘉芙蓮協賓、比提戴維斯、鍾歌羅馥一眾影后，奪得此角，繼而登后，冇咁斤両，如何成事？

    其後擔演《魂斷藍橋》，夫婿羅蘭士奧利花本是男主角，卻被臨時換馬。慧女之失落與哀愁，與羅拔泰萊演來絲絲入扣。羅拔藉此成就事業巔峰，慧女亦自認滿意之作，《魂》片遂成傳世經典。

    伙拍馬龍白蘭度演《慾望號街車》，再成影后。拍攝期間，其任性妄為與鹹濕笑話，收服馬龍仔，兩人遂成老友。導演對慧女雖無好感，殺青後仍不能不大讚好戲，編劇亦言“我寫嘅佢演晒，冇寫嘅都演埋！”

    西門公子