羅子溢專心賺錢養家

    羅子溢演患情緒病的“仁醫”，險些被車撞死。他説現實中常被噩夢驚醒——歲半的囡囡跌落牀！“事實上冇可能，女兒牀邊已用許多枕頭圍住，好似豬欄咁。”老婆楊茜堯也問他：“使唔使咁大壓力呀？”

    還有壓力——羅子溢決定犧牲親子時間，明年北上搵銀。台慶臨近，是否想捧視帝？他毫不猶豫説“要奬金”，專心工作，賺錢養家。

    “好多人提醒我，在內地工作要檢點。”羅子溢乘機派定心丸，稱與老婆互相信任，也不想女兒失望。又強調有責任去為家人帶來幸福，婚後已變得慳家：“買車買衫都按實際需要，反而會買名牌給女兒，又想讓她讀名校。”

    為家人謀幸福，但夫妻要分隔兩地。羅子溢認為維繫夫妻感情，重點係互相信任：“即使拍親熱戲，都會先問準老婆。”又説：“等如我不想老婆拍親熱戲，她都一樣不想我拍。幸好她的另一身份是演員，會睇角色需要，大家互相尊重，不會先斬後奏。”

    發夢也掛住前世情人，羅子溢直認有點苦惱：“囡囡已經有脾氣了，餵她食飯要一個多小時。我都戥佢慘，每日食的都一樣。老婆唔畀佢食零食，親自焗麥包給她。魚、肉、粉、飯都冇味，點會喜歡食。”羅子溢自爆有時會偷偷請女兒食菠蘿包：“她好喜歡食，但濃味的薯條和雪糕就未敢讓她食，怕不能返轉頭。”

    想不想生多個？“目標生夠兩個便收爐！”羅子溢自嘲：“生個仔似我就慘啦，我有多少時間在家呀？講起就慚愧；生仔仲要驚唔成材，生女嫁個好人家就滿足。”老婆打算專心相夫教子？“好現實咁講，若條件吸引，她都可以犧牲一啲親子時間，趁個女上學前做得幾多得幾多。”

    演技大躍進的羅子溢，想唔想攞視帝？想！但自評“機會低”；佢最想多些工作、掙錢養家，帶老婆和女兒去旅行。

    高  梁