

布志綸與蝦頭擔正演出
布志綸演音樂劇《人鬼情未了》
“香港音樂劇節2027”將於明年一月至四月假東九文化中心隆重舉行。日前五大劇目演員為活動開會及拍攝海報,並拍攝宣傳影片為造勢。布志綸將聯同蝦頭、梁釗峰、陳葦璇重演經典劇本《人鬼情未了》,布志綸重溫電影作品加快投入角色:“我知要做男主角,即刻睇返電影版,真係每個場口都好經典,我係好興奮、好期待!(穿牆、扮鬼情節點演?)細個都想發夢可以周圍飛、周圍穿牆,咁去到音樂劇,當然有啲特技效果令到大家睇起上嚟,我真係可以穿到牆嘅。”
蝦頭佢表示經典主題曲《Unchained Melody》可能會保留以英文版演繹,怕翻譯中文會添加喜劇效果:“其實都未必需要改中文,我驚好似家英哥唱《Only You》變咗搞笑版,有另外一種 feel。電影上映時都唔記得幾多歲,可能仲係粒卵子,Alan話戲中要上我身,其實現實中我對能量嘅觸覺都好強烈,總之大家接受所有世事萬物都有佢嘅原因。”
香胤宅將夥拍黃健怡主演音樂劇《出Pool大作戰》,二人拍攝海報時首次見面,二人仲即時交代情史“出Pool”經過,香胤宅自爆為追女神走堂:“我嘅初戀係走堂嘅,當年約咗個女仔約埋幾點學校門口等,之後齊齊走堂!之後我緊張到出晒手汗,反而係對方主動拖我隻手,真係緊張又尷尬。(講舊情史怕唔怕老婆嬲?)唔驚,佢OK嘅。”