^[“]看見_[”]眩暈

用Video Goggle為病人檢查

^“看見_”眩暈

“醫生，我頭一動就天旋地轉，係咪耳石症？”其實，頭暈只係症狀，背後可以有唔同病因。要醫得準，先要分清楚係邊一種暈。

有人覺得間屋在打轉，有人似坐船咁搖，有人頭重腳輕，亦有人企起身眼前一黑。維持平衡，要靠內耳前庭、眼睛、肌肉關節同大腦合作。內耳前庭這條通路，包括：外周的耳石症、梅尼埃病、前庭神經炎；也有中樞的疾病，包括：前庭偏頭痛、小腦或腦幹疾病，都可以引起頭暈；血壓下降、貧血、心律不整或藥物影響，亦可能是原因。

睇醫生時，除咗講“點樣暈”，更要講清楚“幾時暈、暈幾耐、乜嘢會引發”，以及有冇耳鳴、聽力下降、頭痛、怕光怕嘈。醫生會結合病史，檢查血壓、步態、神經系統及眼動，再按需要安排其他檢查。

以“位置性眩暈”為例，瞓低、起身、床上轉身或抬頭時誘發眩暈，都屬這種表現，但不代表一定是耳石症。

最常見的良性陣發性位置性眩暈(BPPV)，俗稱耳石症，是微小耳石走錯位，干擾內耳平衡訊號。典型發作短暫，多數唔夠一分鐘。醫生透過位置試驗，辨認受影響的半規管，再選擇合適的復位方法。

另一常見原因是前庭偏頭痛，亦可以一轉身就暈，而且發作時未必頭痛！過往有偏頭痛病史、怕光怕嘈等，都是線索；治療需要管理誘因、調整作息，必要時用藥。罕見的中樞性陣發性位置性眩暈(CPPV)，可能涉及小腦或腦幹病變；少見的“輕嵴帽”，則可能與內耳感受結構及液體的相對密度改變有關，不能夠一律以耳石復位處理。

那麼醫生是怎樣“看見”眩暈？關鍵往往藏在眼睛。平衡訊號異常，可以令眼球不自主跳動，稱為“眼震”。錄影眼罩(Video Goggles)內置紅外線攝影機，能減少外界視覺干擾，放大、記錄細微眼動。配合前庭功能臨床檢查，醫生觀察眼震方向、出現時間、持續多久及變化，幫助分辨病因，再結合病史作出診斷，明確是耳石症還是前庭偏頭痛、CPPV、前庭神經炎或其他前庭疾病。

同樣是“一郁就暈”，但治療卻是不相同，復位無效後，應重新評估。看清眼動、辨清病因，才能揀選正確的治療，重新企穩、行穩。

離島醫療綜合體北京協和醫院澳門醫學中心

吳海燕 醫生